Aqqutissiuussisut højskoleseminarertut

Århusip eqqaani Kalø Højskolimi apriilip qeqqani kalaallit inuusuttut Danmarkimi højskoleriartortittarneri pillugit inuit 45-t missaat seminareqartitsinermi peqataapput. Peqataasut tassaapput Piareersarfinnit 17-iusunit tamani aqqutissiuussisut pisortaasullu, danskit højskoliinit sinniisut marlussuit, efterskole ataaseq, kiisalu Århusimi Aalborgimilu Kalaallit IIluutaanneersut.

Højskoleseminari Qaqortumit Piareersarfimmit aqunneqartoq Det Grønlandske Center for Danske Højskoler suleqatigalugu Inuussutissarsiornermut, Suliffeqarnermut Niuernermullu Naalakkersuisoqarfiup aaqqissuussaraa. Seminarimut siunertaq tassaavoq danskini højskolinut kalaallit inuusuttut aallartinneqartarnerannut tunngatillugu suleriaatsit suleqatigiinnerillu nukittorsarnissaat, taamaalillutik inooqatigiinnermi oqaatsitigullu piginnaanngorsarneqassammata, kiisalu inuusuttut højskoliniitinnerisigut misilittakkanik ilisimasanik pissarsissammata.

Iliuusissatut pilersaarut pingaarutilik

Seminarimi peqataasunit danskit højskoliinit efterskolimillu, kiisalu Kalaallit Nunaanneersunit misilittakkat oqariartuutillu tassaasimapput Kalaallit Nunaannit ilinniartuusut erseqqissunik anguniagaqartariaqarnerat, aammalu højskolernermik sumut atugaassaneranik ilisimasaqassanerat. Atuarfimmiinnermut anguniagaqartoqassaaq, kiisalu peqataaqataaffigilissallugu ilinniagassamik ataatsimoorfeqartoqartoq ilinniartut ilisimasariaqarpaat.

Kalaallit Illuutaanni ilinniarnermik aqqutissiuussisut ilinniartut nunatsinneersut naapittarpaat, tamaaniinnerinilu oqaloqatigisarlugit. Sammisat aalajangersimasut inuusuttullu nunatsinnersut assut oqaluuserisarpaat, tassaappullu soorlu oqaloqatigiittarnernut, sammeqatigiittarnermut, aammalu danskit inuusuttut inuiaallu allat periusaannut tunngatillugu danskit kulturiat qanoq ittuunerinut tunngasut. Nunatsinnit ilinniartullu Kalaallit Illuutaasa misilittagaat tassaapput højskolimi amerlavallaartoqarangaat killup tungaanut sunniuteqartarpoq, tassalu højskolimi ilinniartut sinnerinut akulerunnissat tungaatigut.

Højskolerneq tassaavoq inuusuttumut iliuusissatut periutsip ilaa, nalinginaasumillu tamaaniinneq innuttaasup oqaatsitigut piginnaasaanut tunngavoq, tassalu siunissamut ilinniagarisassamik aallartissinnaanermut naammassisaqarsinnaanermullu piginnaasaqarluarnerulernissamut tunngatillugu. Taamaattumik Piareersarfimmi pisartutut aqqutissuussisunik piukkunnartussarsiorluni misissuisarneq qitiulluinnartutut inissisimaffeqarpoq.

Seminareqartitsinerup kingornatigut aqqutissiuussisut Piareersarfiillu pisortaat højskolinut assigiinngitsunut højskolertuutinimmik takusaapput, kiisalu tunisassiornermik ilinniarfik tikeraarpaat, kiisalu Odensemi Det Nordatlantiske Husiliarlutik.